Ср, 20/03/2024 - 18:43
Наурыз – халқымыз бар жақсылықтың қайнар көзіне балаған мейрам. Бұл күні он сегіз мың ғалам, жеті қат Жер жаңғыруға, жаңаруға ұмтылатын Ұлыстың ұлы күні.
Бұл мейрамның мән-маңызы өте терең.
Жыл өткен сайын Наурыз мейрамы елімізді мекендеген күллі халықтың, ұлт пен ұлыстың асыға күтетін ортақ мерекесіне айналып, жаңа мазмұнмен, жарасымды сән-салтанатымен аталып өтуде.
Ал осы мерекеде жайылатын қазақтың дастарханы халқымыздың пейілі секілді кең, дархан.
Үйіне келген мейманды құтқа балаған халықтың жайсаң мінезі дастарханға қойған асынан-ақ аңғарылып тұрады.
Әз-Наурыз мерекесімен тұспа-тұс келіп отырған Рамазан айына орай Алматы қалалық сотының судьяларына ақ дастархан жайылып, ауызашар берілді.
Алматы қалалық сотының төрағасы Асқар Смайлов әріптестерін өзге мерекелерден шоқтығы биік Әз-Наурыз мерекесі - жаңғыру мерекесімен құттықтады.
Қазақи нақыштағы камзол киген судьялар мерекенің сәнін, жаңа жылдық берекенің мәнін кіргізді. Көптен күткен Әз-Наурыз мерекесі Рамазан айымен қатар келіп, сот жүйесіне тағы бір ұмытылмас әсерлі күн сыйлады.
Жыл басы – Әз наурыз құтты болсын!