Сс, 01/04/2014 - 22:53
Қалдарбек Жорабайұлы, қазір бұрынғыдай емес, азаматтық сипаттағы дау-дамайлар көбейді. Осындай істерді қарау барысында судьяларға кедергі келтіретін басты қиыншылық қандай?
– Ол кейбір тараптардың қарсы жаққа айтар уәжі мен келтіретін дәлелдері болмағандықтан сот мәжілісінің өтетіндігінен күн ілгері құлағдар бола тұра түрлі сылтау айтып, қасақана келмей қалатындығы. Азаматтық дауларды қараудың қылмыстық істерге қарағанда өзіне тән ерекшелігі көп. Қылмыстық істердің алғашқы амалдарын тергеу органдары жүргізіп, сотқа дейін жеткізсе, азаматтық дау-дамай бойынша қазының төрелігіне жүгінетін әр тарап құжаттар жинақтап, өздерінің әрекеттерінің дұрыстығын дәлелдеуі керек. Өкінішке қарай, сотқа заң жолымен қуынып келетін тараптардың кейбірі құқықтарын жетік білмегендіктен мәжіліс үстінде іс-әрекеттерінің дұрыстығын дәлелдей алмай, ұтылып жатады. Заман өзгерсе де көптеген азаматтарымыздың түсінігі сол баяғы қалпында қалып қойған. Алыс-беріс жасасқан кезде мәмілелерін заң талабына сәйкес рәсімдеп, қолхат алмайды. Банктермен, басқа да тараптармен белгілі бір қаражат пен мүлік жөнінде келісімшартқа отырған кезде толтырылған құжаттармен толық таныспай, қол қоя салатындықтан сот отырысында ұтылып, жиған-тергенінен айырылып қалады. Немесе алаяқтардың арбауына түсіп алданады.
– Дау-дамайларды қараған кезде нотариус арқылы куәландырылмай, жалаң қол қойыла салынған қолхаттың қаншалықты заңдық күші болады?
– Сот отырысы кезінде ондай қолхаттар дәлел есебінде қабылданады. Десе де, артық шу мен айқай туындамас үшін алыс-беріс қарым-қатынастарының нотариус арқылы рәсімделгені дұрыс. Қажетті құжаттар заң талабына сәйкес жинақталса, тараптар бір-біріне кінә таға алмайды. Өкініштісі, азаматтарымыз осы жағына мән бермейді. Қазір құжаттарды нотариустар арқылы рәсімдеуде зейнет жасындағы адамдарға белгілі бір жеңілдіктер жасалған. Алайда, азаматтарымыздың басым көпшілігі заңның сол игілігін пайдаланбай, азын-аулақ тиын-тебенін төлегісі келмей, қолхат ала салады. Егер мәміле жасасқан адамдар жастары он сегізге тол-ған, ақыл-есі түзу адамдар деп танылса және қолхат өзге біреудің қысым қиянатынсыз жасалса, онда ол дәлел ретінде қабылданады.
– Қазір банктермен арада дау көп.
– 2006, 2007, 2008 жылдар аралығындағы жекелеген азаматтардың несие алу үшін банктермен жасасқан келісімшарттарының мазмұнымен танысып көрсеңіз, көбінесе дауға азаматтардың құқықтық сауаттарының төмендігі себепкер болғандығын байқар едіңіз. Көптеген адамдар банкпен арадағы жасалған келісімшарттың мазмұнымен таныспай жатып, қол қоя салған. Солардың тым құрыса бүгін алып отырған несиесін ертең 15-20 пайыздық өсіммен қайтаратындығын ойламағандығына таң қаласың. Банктер көп жағдайда несие берер кезде келісімшартты өздерінің пайдасына қарай ыңғайластырып жасап, ақша алушының құқықтық сауатының төмендігін пайдаланып, құжаттарға қол қойдыртып, заңдастырып алатындықтан сотта ұтылмайды. Сот тәжірибесінде банктен 100 миллион теңге алып, ақыр аяғында баспанасы мен қымбат көліктерінен, жұмыс істеп тұрған шағын бизнестерінен айырылып, тақырда отырып қалғандардың дерегі аз кездеспейді. Қызығы, банктер сол мүліктерді ең төменгі бағамен алады. Несиесін төлей алмаған борышкердің банктің мұндай талабымен келіспеске амалы қалмайды.
– Каспий банк пен оның несие алушылары арасындағы ширыққан айтыс таяу арада сотта қаралатын көрінеді. Шағымданушылар банктегілердің несие алушыларды алдап, келісімшарттың алғашқы және соңғы бетін ғана көрсетіп, ортасындағы парақтарды жасырып қалған құйтырқы әрекеттерін айтып отыр. Бұл қаншалықты шындық?
– Несие алушылар мен банк арасындағы дау-дамайдың ақ-қарасы сотта қаралып, ажыратылмағандықтан әзірге ол жөнінде кесімді пікір айта алмаймын. Солай бола тұрса да, банк қызметкерлерінің шалағайлығы мен салақтығынан несие алушының орнына оның жақын туыстарының қол қойып жіберуі сияқты деректердің кездескені рас. Меніңше, несие үстірт қарайтын нәрсе емес, сондықтан да, келісімшарттың әр бетіне алушының қолы қойылуы керек. Десе де, несие алушылардың тарапынан кететін кемшіліктер де аз емес. Жұрттың көбісі әлі күнге дейін несиеге алған қаражатым өткен ғасырдың аяғындағыдай құнсызданып, арзымайтын ақшаға айналады деген көзқараспен қарайды. Осыдан бес-алты жыл бұрын банктер үстемелерін қосып жаппай несие бере бастаған кезде сондай түсінікте жүргендер доллар мен теңге құнсызданып, ақыры қара бақырға айналады деген қате ойға малданып, алған қарыздарын бастапқы екі-үш жыл төлеп, одан кейін жауапкершіліктен жалтарудың сан алуан амалдарын іздестіріп көрді. Осы жерде егер банктің талабы дұрыс болмаса, онда несие алушы қарызын 2-3 жыл бойына неге төлеп келген деген сауал туындайды. Осы мәселеге заңдық тұрғыдан талдау жасасақ, оның түп төркінінен тағы да кейбір азаматтарымыздың өз құқықтарын толық білмейтіндігі төбе көрсетіп қалар еді. Жалпы, банктен несие алатын адамның заңнан хабары бар адамдармен ақылдасып алғанының артықтығы болмас еді.
– Сот тәжірибесінде кейбір тіс қаққан алаяқтар біреудің мүлкін алдап алып, одан кейін оны ізін жасыру мақсатында өзінен кейін 2-3 адамға сатып ұстатпай кететіні бар. Ақыр аяғында оның залал, зардабын ең соңғы сатып алушы тартып жатады.
– Мұндай деректер аз да болса ұшырасып тұрады. Сатқан адам мүлкінің құжатын заңға сәйкес рәсімдеп саудаласа, онда соңғы алушы ар-ұяты бар сатып алушы деп танылады. Алайда, оны сот процесі барысында дәлелдеу өте қиын. Өз басым заңның бұл талабын онша құптай қоймаймын. Неге десеңіз, мұндай жағдайда соңғы сатып алушының ақшасынан да, мүлкінен де айырылып қалуы әбден мүмкін. Қазіргі кезде соңғы сатып алушыға келтірілген шығынды алғашқы сатушыдан өндіріп алу жағы қарастырылу үстінде. Меніңше, бұл дұрыс байлам.
– Кейбір азаматтардың сатып алған баспанасының арада 2-3 ай өткен соң сот орындаушылары арқылы тоқтамға алынғанын біліп сан соғып қалатыны бар.
– Ондай деректер жоқ емес. Осыдан бір-екі жыл бұрын кепілге қойылған баспананы немесе мүлікті шектеуден алып тастап, ол сатылып кеткеннен кейін қайтадан тіркеумен айналысқан қылмыстық топтың мүшелері жауапқа тартылды. Өз басым келешекте мұндай жағдайларды болдырмау үшін қосымша заңдар қабылдау қажет деп ойлаймын.
– Жоғарғы Сотта Азаматтық іс жүргізу кодексінің жаңа жобасы әзірленіп жатқаны белгілі. Қосар ұсынысыңыз бар ма?
– Қазір азаматтық сипаттағы дау-дамайларға талапкердің берген сенімхаты негізінде заңнан хабары жоқ жақын туыстары мен көршілері де қатыса береді. Ондай адамдар заңгерлік білімі жоқ болғандықтан сот үстінде әрекеттерінің дұрыстығын дәлелдей алмай, соңында өз өздерімен жанжалдасып жатады. Меніңше, сенімхат талапкердің заңгерлік білімі бар туыстары мен қорғаушыға ғана берілуі керек. Сонда ғана тәртіп болады.
– Әңгіме адвокат дегеннен шығады, қылмыстық істерді қарау барысында әлеуметтік жағынан қорғалмаған адамдарға, зейнеткерлерге мемлекет тарапынан адвокаттың тегін көмегі ұсынылады. Азаматтық істерде осындай жеңілдіктер қарастырылған ба?
– Азаматтық істерді қарайтын судья күн көрісі нашар отбасылар мен мүгедектерге қорғаушының көмегі қажет деп тапса, жеке қаулы шығарып, адвокатпен қамтамасыз етеді. Мұндай адвокат іске қатысқан уақытына қарай мемлекеттен тиісті ақысын алады.
– Бүгінгі адвокаттардың білімі мен біліктілігіне көңіліңіз тола ма?
– Іс қарау барысында байқайтыным, көптеген адвокаттардың біліктіліктері ылғи да олқы соғып тұрады. Көбісі құжаттарды дұрыс, талапқа сай толтыра алмайды. Соның салдарынан судья белгіленіп қойылған сот отырысын шағым талапқа сай жасалғанға дейін кейінге шегереді. Оны дұрыс түсінетін адвокаттар соттың ескертпесін дұрыс қабылдайды, түсінбейтіндері «шағымымызды қарамай жатыр» деп судьяның үстінен арыз жазады.
– Көптеген судьялар тараптардың бірі сот мәжілісіне бірнеше рет келмегеннен кейін сырттай шешім шығарады. Алайда, талап-арыз берушілердің көбісі соттың шақыру қағазын алмағандығын мән-жай есебінде сылтау етіп, ақталып жатады. Шын мәнінде солай ма?
– Мұндай жағдайлардың сот тәжірибесінде оқта-текте кездесіп тұратындығы рас. Келмеген тараптарды сот приставын жіберіп алдыртамыз немесе олар себептерін айтып, қолхат жазып береді. Сырттай шешім сондай кездерде ғана шығарылады. Егер келмеген тарап шын мәнінде соттың шақыртқанынан бейхабар болғанын судьяның алдында дәлелдеп берсе, онда сырттай шешім бұзылып, сот отырысы қайта тағайындалады. Кейбір тараптар шақыру қағазын алмағанын баяндап, қалалық сотқа шағым түсіреді. Алайда әлі күнге тараптардың бірінің шақыртудан бейхабар қалғанына байланысты аудандық соттың шешімінің бұзылған дерегін кездестірмеппін.
– Әңгімеңізге рахмет!
Қалдарбек ДОСЫМБЕТ, Алматы қаласы Бостандық аудандық сотының төрағасы:
Автор: Пікірлескен Елеусіз МҰРАТОВ, «Заң газеті»